Ben Madilynn
Wa mahitsura ang pickup truck human kini malahos ngadto sa nagparada nga trailer truck nga anaa gi-park daplin sa highway sa Barangay Langtad, Dakbayan sa Naga.
Ang maong aksidente sa kalsada nahitabo sa 4:40 sa kaadlawon, Sabado, Septiyembre 14, 2024.
Dugo nagpasad sa kalsada sa dihang usa sa tulo ka mga sakay sa pickup ang nagrabehan nga miresulta sa iyang kamatayon.
Base sa inisyal nga imbestigasyon sa kapulisan ang Fleet Liner trailer truck nga gimaneho ni Jayson Marven Cabrillos, 25, taga Barangay Basak, Dakbayan sa Lapu-Lapu.
Samtang ang puti nga Toyota Hilux pickup gimaneho sa 24 anyos nga alyas Johnny taga Olangapo City.
Sigon sa imbestigasyon ni Police Senior Master Sergeant Ken Cabrera, Naga City Police Station nga ang pickup gikan sa Naga ug paingon sa Lungsod sa San Fernando.
Samtang ang trailer truck nagpadaplin og parada sa maong dalan.
Gituohan nga wa makabantay o nakatagpilaw ang drayber sa pickup nga milahos ug midasmag sa trailer truck.
Maayong pagkagusbat sa pickup sa dihang napasok sa trailer, samtang ang pasahero niini nga diha sa frontseat nga si Robert Jimenez, hamtong, taga Brgy. Casa Mira Barangay Langtad, Naga ang milugwa sa sakyanan nga nagkadugo.
Si Jimenez gideklarar sa mananambal nga dead on arrival sa ospital.
Ang drayber sa pickup ug lain pa nga kauban nga giila sa pangalang Ron, 34, ang nangaangol.
NAKAINOM?
Si Police Lt. Col. William Homoc, hepe sa Naga City Police Station nagkanayon sa dihang nahinabi sa Superbalita Cebu nga hubog ang drayber sa pickup ingon man kauban niini nga pasahero.
Ang konpirmasyon ni Homoc base sa liqour test nga gihimo ngadto sa drayber nga si Johnny.
“Ang trailer truck pwerti nang daplina naka park. Ang ligid toa sa daplin gawas sa kanal sa karsada dihang gidaro sa pickup,” dugang ni Homoc. / DVG, GPL
