Philippine Coast Guard, tinulungan ti maysa nga Chinese crew a naputedan ti makin-kannigid a tangan bayat iti panagturong iti kabaybayan ti Antique

Tinulungan dagiti medical personnel ti Philippine Coast Guard ti maysa nga tripulante a Chinese nga aksidente a naputedan ti makinkannigid a tanganna gapo iti metal fan blade kabayatan iti panagdaliasat ti 20.69 nautical miles laud ti Semirara Port, Caluya, Antique, idi Hulyo 4, 2024.

Ti Chinese crew ket agtawen-35 ken maysa a second engineer ti Hongkong-flagged bulk carrier nga MV BBG Qinzhou.

Naggapo ti barko manipud Nansha, China nga agturong kuma idiay Tanjung Bara, Indonesia idi mapasamak ti insidente.

Dagos nga indeploy ti Philippine Coast Guard ti BRP Kalanggaman iti lokasyon ti Chinese vessel nga 1.5 nautical miles idiay Nogas island, Anini-y, Antique.

Nangiyusuat ti uppat a kameng ti PCG medical team iti first aid bayat iti panagturong idiay Muelle Loney Wharf, Iloilo City ken dagos naiturong ti biktima iti kaasitgan nga hospital para iti kanayunan nga atensyon medical.