Pharmacy gilungkab P100K nawala

NAKURAT na lang ang staff sa ThreeSixty Pharmacy nga nahimutang sa North Road, Barangay Jagobiao, Dakbayan sa Mandaue niadtong sayo sa buntag, Martes, Hunyo 3, 2025, nga aduna nay lungag ang sementado nga bungbong ug nagpasad ang mga tipaka sa semento agi sa gibakbak nga pader. 

Matod ni Mandaue City Police Office (MCPO) spokesperson Lt. Col. Mercy Villaro nga gidudahan nga tulo ngadto sa lima ka tawo ang nihimo sa maong pagpanglungkab pinaagi sa paglungag sa sementado nga bungbong nga ang luyo nga bahin bakante nga lote. 

Gihulagway sa kapulisan nga way security guard nga nag-duty atol sa hitabo hinungdan nga sayon lang nga gisulod sa mga kawatan. 

Ang insedente nadiskubrehan sa mga alas 5:50 sa buntag sa manager sa pharmacy nga si Jam Fuente, 39, taga Sitio Tundan, Barangay Basak ug mao nay nipahibalo sa kapulisan. 

Matod pa ni Villaro nga nagduda ang mga imbestigador nga sulod sa tulo ka adlaw nga gihimo ang paglungag nga wa mamatikdi sa mga empleyado.

Dugang pa niya nga ang mga suspek posible nga lokal lang nga nasuhito sa operasyon ug floor plan o layout sa maong establisemento hinungdan nga nakasulod nga wala mamatikdi. 

Atol niining pagsulat, padayon pa nga gisusi kon unsa pay ubang butang nga nawala ilabi na ang ang pipila sa baligya nga softdrink ang gipang-inom, gawas sa halin nga gibanabana nga P100,000 nga nadala. 

Samtang ang mga suspek pabiling gawasnon.

Gisusi na sa mga polis ang closed-circuit television (CCTV) footage sa silingang establisemento ug giawhag ang publiko sa pakig-alayon sa kapulisan ilabi na niadtong adunay nakaila o kasayuran maong hitabo. 

SEGURIDAD 

Samtang si Cebu City Police Office (CCPO) Director Col. Enrico Figueroa nimando sa 11 ka mga police station chiefs nga pahugtan ang seguridad sa ilang hurisdiksiyon. 

Gikinahanglang nga adunay imbentaryo sa mga financial institutions sa ilang lugar ug ang pagsusi kon paigo na ba ang seguridad nga gipatuman.

“Our instruction to all our station commanders is they will conduct an inventory in their area of responsibility (AOR) of financial institutions like LBC, pawnshops, so we can see their security,” matod pa ni Figueroa.

Iyang gipahimug-atan ang pagsusi sa mga alarm system kon anaa pa sa maayong kondisyon ug ang pagsiguro sa kinatibuk-ang security protocols. / dugang taho ni AYB