Ben Madilynn
LA UNION – Nadepensaan ni UFC light heavyweight world champion Alex Pereira iti maikatlo a gundaway ti iggem na a titulo.
Daytoy ket kalpasan a tinumba na iti challenger a ni Khalil Rountree Jr. iti UFC 307 main event a naisayangkat idiay Delta Center, Salt Lake City idiay Utah.
Rugi pay laeng ti laban ket nagbalinen nga agresibo ni Roundtree, idinto a kalmado laeng ni Pereira.
Ngem idi simrek ti Round 2, nangrugi metten nga umasok ni Pereira babaen iti nagsasaruno a kugtar ken danog kontra iti kalaban.
Gaputi nakaru a sugat a sinagaba ni Roundtree iti maikapat a round, ket insardengen ti referee iti laban.
Addaan ti 12 a panangabak ken dua a pannaka-abak ni Pereira idinto a ni Roundtree ket addaan ti record a 14-wins ken innem a pannaka-abak.
