Pasigarbo, Suroy-Suroy Sugbo pang-self promotion ra

Mas gipaila ang pagkatawo ni Gobernador Gwen Garcia ug dili pag-promote sa turismo sa Sugbo ang katuyoan sa Pasigarbo sa Sugbo ug Suroy-Suroy Sugbo.

Kini maoy reaksyon ni kanhi Department of Tourism secretary Ace Durano, human gipahibalo ni Governor-elect Pamela Baricuatro nga wagtangon na ang duha ka dagko nga kalihukan sa kapitolyo.

Si Durano mao unya ang Special Adviser for Economic and Political Affairs ni Baricuatro.

Gihulagway ni Durano nga ang Pasigarbo ug Suroy-Suroy naka-focus sa self-promotion ni Garcia imbes sa actual tourism promotion. 

Gitataw ni Durano nga ang bag-ong administrasyon mouna sa “honest-to-goodness” destination development nga makahatag og kaayuhan sa komunidad nga moduso alang sa malambuon nga facilities ug services, ilabi na sa healthcare.

“Ang nakita nako anang Suroy-Suroy, it was more on self-promotion rather than tourism promotion,” matod ni Durano.

Iyang gidugang nga ang malambuon nga tourism destinations nagkinahanglan og maayong facilities, serbisyo, ilabi na gyud sa emergency health services.

“Unsaon man aron modugay sila dira (tourism destinations)? Facilities gyud, services unya ang usa gyud nga akong nakita kani gyung health services, kaning emergency services,” sigon ni Durano.

Sayo niini, si Baricuatro nipahibalo na nga wagtangon niya ang Pasigarbo sa Sugbo ug Suroy-Suroy Sugbo ug ang pundo nga gigamit niini matag tuig, ihapak alang sa healthcare, pagpalambo sa mga district ug provincial hospitals. / CDF