Pannakaiyuswat ti Sunday Market iti Kapitolio Probinsial, naitantan

LAOAG CITY – Kinumpirmaran ni Mrs. Elma Gabriel, mangidadaulo ti Micro Small and Medium Enterprises Office a naitantan ti pannakaiyuswat ti Sunday Market iti Kapitolio Probinsial.

Segun kenkuana, daytoy ti napagtulagan ti opisinada ken iti Provincial Tourism Office tapno maipaayan ti gundaway tapno nasaysayaat a maiprisentar ti light show kas paset ti Provincial Fiesta iti kallabes.

Inbatadna nga uray nalpasen ti Ilocos Norte Fiesta ket saan pay laeng a maisubli ti Sunday Market gapu ta manarimaan a maplanplano ti baro nga estratehia a pannakaipatungpalna daytoy.

Kunana a kalikagum ti opisinada a mapagkakadua dagiti agpapada iti produktona nga idiaya iti publiko.

Inyarig ni Gabriel iti coffee and pastries a Micro Small and Medium Enterprise a magrupoda kasta met ti Ilocano Artistry.

Inpettengna a daytoy ket tapno maipaayan ti gundaway dagiti amin a Micro Small and Medium Enterprise ken maaddaan ti pagsentroan iti tunggal pannakaisayangkat ti Sunday Market.

Innayonna a manamnama a maisubli daytoy nga aktibidad ita a bulan ti Hulio ken maiyuswat iti sangoanan ti Kapitolio Probinsial.