Panangpainget ti public awareness maipapan ti fraternity hazing, inpanawagan ti maysa a Senador
Mario Bautista
Nagpanawagan ni Senador Juan Miguel Zubiri dagiti key government agencies a paingiten iti public awareness maipapan iti peggad ken legal consequences ti fraternity hazing.
Karaman kadagiti inawagan ti senador ti Commission on Higher Education (CHED), Department of Education (DepEd), ken Department of the Interior and Local Government (DILG).
Daytoy a panawagan ni Zubiri ket sumaruno iti sentensia dagiti suspek iti pannakatay ti biktima ti hazing a ni Horacio ‘Atio’ Castillo III ken kasaruno met ti kaso ti pannakatay ti agtawen iti sangapuo ket walo nga estudyante idiay Nueva Ecija gapu met iti hazing.
Inlawlawag ni Zubiri a dagiti nangpapatay ken ni Atio ket nasentensiaan babaen ti 1995 Anti-Hazing Law ken saan a babaen ti 2018 version ti linteg, isu nga awan ti nasentensiaan nga school official gapu iti pannakatay ti biktima.
Plano ni Zubiri a makisarita ken ni Education Secretary Sonny Angara ken Commission on Higher Education (CHED) Chair Prospero de Vera tapno mangipaulog dagiti pagadalan ken unibersidad iti memo a mangballaag kadagiti organization, fraternities, ken dadduma pay a grupo a ti hazing ket krimen ken sumango iti pannusa iti sidong ti linteg.
Nagapela pay ni Zubiri kadagiti lider ti fraternity a kondenarenda dagiti naranggas a hazing practices.
