Panagaramat kadagiti “black soldier fly”, maisingsingasing para iti panakaimanehar ti nabubulok a basura iti Baguio City

Makitkita a maysa kadagiti parikut iti panagaramat ti “black soldier fly” kadagiti nabubulok a basura iti Baguio City ti panakaiyam-ammo daytoy iti publiko ken nu kasanoda nga awaten daytoy a konsepto.

Iti panakaiuman Bombo Radyo kenni Dr. Roland James Bayang, maysa nga Agripreneur Consultant, makatulong ti “black soldier fly” iti panangpalag-an wenno panangrisut iti problema iti siudad seknan iti umno a panakaimanihar dagiti nabubulok a basura.

Daytoy ket gapu ta dagiti larvae ti nasao a klase ti ngilaw ket mangmangan kadagiti nabubulok a basura.

Inlawlawag ni Dr. Bayang a ti blacksoldier fly ket saan a kas iti ordinaryo a ngilaw nga ammo ti publiko gapu ta ti babai a black soldier fly ket diritso nga agitlog iti pangibelbellengngan kadagiti nabubulok a basura nu sadino  ditoy met a kanen ti larvae dagiti nabubulok a basura.

Innayon ni Dr. Bayang nga adda daytoy a klase ti ngilaw iti siudad ngem saan nga umdas a maaramat kadagiti nabubulok a basura a mapapataud iti siudad.

Gapu iti dayta, isingsingasingna ti breeding ti “black soldier fly” kadagiti barangay tapno makasursuro metlaeng dagiti residente ken tapno nalaklaka a maimanihar daytoy.

Iti agdama, saan pay a naiprisintar daytoy iti City Council ngem manamnama ti kolaborasyon dagiti maseknan nga opisina para iti panakaadaptar ti nasao a teknolohiya.//Bombo Rob Dominguez