Ben Madilynn
Nagduda si Cebu governor-elect Pamela Baricuatro niadtong Huwebes, Mayo 15, nga mapadayon ang programa sa P20 matag kilo nga bugas humay, tungod sa pagrepaso sa pundo sa kagamhanan sa Lalawigan sa Sugbo ug mga local government units (LGUs).
“I don’t really think it’s sustainable,” matod ni Baricuatro atol sa radio interview niadtong Huwebes, Mayo 15, 2025.
“We will see if merong funds then why not, ‘di ba? Pero if wala, we cannot spend what we do not have. So, I have to check and look into it,” siya nidugang.
Nagplano si Baricuatro nga mohimo og audit ug review sa panudlanan sa Kapitolyo ug sa tibuok local government units ubos sa hurisdiksyon sa Probinsya sa dili pa siya molingkod sa katungdanan.
Matod ni Baricuatro nga iyang tumong mao ang pagsuta sa kahimtang sa kapasidad sa Probinsya aron masiguro ang klaro nga pagsugod sa pagdumala.
Si Baricuatro nga nidagan ubos sa PDP-Laban niingon nga iyang susihon ang kapuslanan sa programa.
Ang pahayag ni Baricuatro giluwatan pipila ka adlaw human gibalik sa probinsya ang pagbaligya sa tag P20 matag kilo nga bugas ubos sa inisyatiba nga “Bente Bigas Meron Na” sa administrasyong Marcos.
Ang programa temporaryong gisuspenso tungod sa election ban, apan gibalik kini pagkahuman sa eleksyon.
Sa taho sa SunStar Cebu niadtong Biyernes, Mayo 16, gibalik na sa Sugbo ang pagbaligya sa tag P20 matag kilo nga bugas gikan sa National Food Authority (NFA). / CDF
Source: Pam nagduda kon P20 nga bugas magpadayon
