Pagbukas sa klase hugot gipanukaran

SAMTANG nangandam ang Department of Education (DepEd) sa pagsugod sa pag-abli sa klase sa 2025–2026 sa Hunyo 16, nagpahugot sab ang Police Regional Office-Davao Region (PRO-Davao) sa seguridad sa tibuok rehiyon aron pagseguro sa kaluwasan sa mga tinun-an, ginikanan, ug mga magtutudlo.

Ilawom sa inisyatibo nga gitawag og “Oplan Balik-Eskwela,” gipahibalo ni PRO-Davao Regional Director Police Brigadier General Leon Victor Z. Rosete ang pagpakatag og 1,572 ka mga pulis sa mga nag-unang lokasyon sama sa mga tulunghaan, terminal sa transportasyon, tugpahanan, pantalan, ug shopping centers. Kini nga lakang gitumong sa pagmentinar sa kalinaw ug kahusay sa pag-abli sa klase.

Aron nga makahatag gilayon og abag ug matubag ang mga panginahanglan, ipahimutang ang Police Assistance Desks (PADs) sa estratihikong mga lugar. Gitin-aw ni Rosete nga ang kaimportante sa panag-alayon sa komunidad, nag-awhag sa publiko nga itaho ang bisan unsang kadudahan nga kalihukan ngadto sa pinakaduol nga police stations o nagpatrolyang mga pulis. Iyang gibansiwag ang panawagan ni Philippine National Police Chief General Nicolas D. Torre III: “Tulungan ninyo kaming, tulungan kayo,” nagpahimug-at sa panag-ambit sa responsabildiad aron pagseguro sa luwas nga palibot alang sa mga tulunghaan.

Ang pagbukas sa klase nagtimaan sa pagbalik sa tradisyonal nga Hunyo-hangtud-Marso nga academic calendar subay sa nalatid sa DepEd Order No. 012, Series of 2025. Giaprobahan ni Presidente Ferdinand Marcos Jr. niadtong Mayo 2024, ang kausaban maoy tubag sa kabalaka sa publiko bahin sa grabe ka init nga panahon sa niaging Abril-hangtud-Mayo nga eskedyul. Ang academic year molahutay sulod sa 197 ka adlaw nga klase, magtapos sa Marso 31, 2026.

Ang enrollment ug ang tibuok nasud nga “Brigada Eskwela” maintenance nga aktibidad gitakda sa Lunes, Hunyo 9 hangtud sa 13, maghatag sa mga tulunghaan og igong panahon nga makapangandam una magsugod ang klase.

Samtang mangandam ang Davao Region alang sa bag-ong tuig sa ting-tungha, ang naghiusang paningkamot sa mga awtoridad ug komunidad nagtinguha nga makamugna og luwas ug magsuporta sa “learning environment” alang sa tanan. (David Ezra Francisquete)