Ben Madilynn
SIKPAW ang usa sa giilang most wanted person sa Malungon, Sarangani Province nga adunay patong-patong nga kaso sa gihimong operasyon sa kapulisan sa Sulop Municipal Police Station sa Davao del Sur, adlaw’ng Martes, Septyembre 10, 2024.
Pinasikad sa arrest warrant nga gisilbi sa Sulop Municipal Police Station (MPS), pinangunahan ni PCapt. Ronald Ditan uban ang Intel Personnel sa Malungon MPS ug ubang puwersa sa mga awtoridad, wa na maka-ikyas ang usa ka George Boclaras Son III, 33-anyos, minyo, sastre nga taga-Purok Maliwanag, Barangay Poblacion, Malungon, Sarangani Province. Naaresto si Boclaras sa Purok 10, Barangay Poblacion, Sulop, Davao del Sur diin siya natiktikan nga uwahing nakita.
Si Son, nag-atubang og kasong paglapas sa Section 28 (A) Republic Act (RA) 10591 kon Comprehensive Firearms and Ammunition Regulation Act; paglapas sa Section 11, Article 11 RA 9165 kun Comprehensive Dangerous Drugs Act of 2002; pagsupak sa Section 12, ART 11 RA 9165 nga gipaguwa ni Judge Paolo Rojas Aquino, presiding judge sa Regional Trial Court, Branch 49, 12th Judicial Region, Malungon-Alabel, Sarangani Province, pinetsahan og Septyembre 3, 2024.
Wala na nagmagahi pa ang suspetsado dihang naabtan sa kapulisan sa dapit nga daling gibasahan sa iyang mga katungod. Gisala sab siya dayon didto sa Malungon MPS alang sa pagkustodiya.
Dakong piyansa ang gitakda sa korte alang sa temporaryong kagawasan sa suspetsado. Gitakda ngadto sa P120,000 alang sa kasong kalapasan sa section 28 (A) sa Republic Act 10591; laing P200,000 alang sa paglapas sa section 11, Article 11 sa Republic Act 9165; laing P40,000 alang sa paglapas sa section 12; ug P360,000 sa laing kaso ilawom sa Article 11 sa RA 9165. (July Aubrey Revilla Ngo)
