Ben Madilynn
Lima ka kilo nga gituohang shabu ang nasakmit sa mga sakop sa Philippine Drug Enforcement Agency (PDEA) 7 uban sa Naval Forces Central, Philippine Maritime Police ug Bohol Provincial Drug Enforcement Unit atol sa gilusad nga buy-bust sa Binayran Road, Barangay Dampas, dakbayan sa Tagbilaran, Bohol, alas 9:00 sa gabii, Lunes, Septiyembre 9, 2024.
Ang suspek nga nadakpan giila nga si Robert Tiro, 42, residente sa Tagbilaran, nakuhaan og lima ka vacuum-sealed packs nga shabu nga dunay gibug-aton nga 5,000 grams nga dunay estimated average market value nga P34,000,000.
Lakip sa nakuha ang buy-bust money, usa ka cellphone ug usa ka sakyanan nga sedan o awto.
Ang mga nakuha nga ebidensya gisubmiter na sa PDEA 7 alang sa chemical analysis.
Matod ni Leia Alcantara, information Officer sa PDEA 7, nga usa ka buwan nila nga gipaubos sa case build up human nila madawat ang impormasyon sa kasaligang tinubdan.
Base sa nakuha nga kasayuran nga makabaligya ni og 2-3 kilos nga shabu matag semana sa lalawigan sa Bohol.
Usa kini ka follow up operation human sa malampuson nga anti-illegal drug operation sa Barangay Marigondon, dakbayan sa Lapu-Lapu sa Agusto 8, 2024 diin duha ka kilos ng ilang nakuha gikan kang Mark Niño Caliniahan nga iyang pag-umangkon.
Wala lang una mohatag og detalye si Alcantara kung asa gikan ang maong supply sa illegal nga drugas ilabi na nga daghan ang nakuha gumikan kay nagpadayon pa ang ilang pagsukit-sukit kang Tiro.
“Sa pagkakaron sir nagpadayon pa ang atung validation kung asa gikan ang supply sa drug nga atung nakuha,” matod ni Alcantara.
Gibutyag hinuon ni Alcantara nga si Tiro bag-o pa nga nailhan nga nalambigit sa illegal nga drugas ug wala pa silay record niini.
Sa pangutana kung nganongdako o kadaghan sa ilegal nga drugas ang naabot sa Bohol, matod ni Alcantara, ang maong probinsya giila na usab nga trans shipment point sama sa Sugbo.
Gawas nga agianan kini sa supply sa illegal drugs daghan usab ang mgas kustomer tungod kay usa ka tourist destination ang maong lalawigan.
Subay niini, gipahugtan sa PDEA 7 uban sa kapulisan ang ilang monitoring sa mga dagkong personalidad nga mopalusot sa supply sa illegal drugs sa Bohol gikan sa silingang rehiyon. / AYB
