Ben Madilynn
Moabot sa P13.7 milyunes nga balor sa ilegal nga drugas ang nasakmit sa kapulisan sa lalawigan sa Bohol atol sa gilusad nga buy-bust, ala 1:18 sa buntag, Biyernes, Enero 10, 2025, sa Purok 4, Barangay Dao, lungsod sa Dauis, probinsya sa Bohol.
Ang nasikop giila nga si Jessie Baginang 26, taga Purok 4, Barangay La Paz, lungsod sa Cortes, Bohol.
Nasakmit sa mga sakop sa Provincial Intelligence Unit sa Bohol Police Provincial Office sa pagpangulo ni Police Lieutenant Colonel Joemar Pomarejos ang dagkong putos sa gituohang shabu nga motimbang sa 2,020 gramos nga dunay standard drug price nga P13,736,000.
Ang maong mga nakuha nga ebidensya dali ni nga gi-turnover sa Provincial Forensic Unit alang sa laboratory examination.
Matod ni Pomarejos nga si Baginang maoy tinubdan sa dagkong supply sa ilegal nga drugas sa Bohol.
Siya ang gitudlo sa usa drug personality nga ilang nadakpan sa lungsod sa Cortes niadtong Hulyo 20, 2024 diin nakuhaan kinig 1.5 kilos nga gituohang shabu.
Tungod niini, gidayeg sa Police Regional Office (PRO) 7 officer in charge Police Brigadier General Dionisio Bartolome ang kapulisan sa probinsya sa Bohol sa maong kalampusan.
Matod ni Bartolome nga ang PRO-7 mopakusog pa sa ilang kampanya batok ilegal nga drugas diin ang ilang target mao kadtong mga tinubdan sa drugas.
“The operation was part of our anti-illegal drugs strategy, which targets the sources and supply chains of illegal substances while tackling the drug menace, following the directives of the Chief, PNP. With the trust and confidence of the community in our police force, we are committed in making Central Visayas a safer and more prosperous place for all,” matod ni Bartolome.
Giandam na ang kasong kalapasan sa Section 5 ug 11, Article II, Republic Act 9165 nga ipasaka sa kapulisan sa Bohol sa maong suspek.
Samtang nasikop usab sa Cebu Police Provincial Office ang usa ka high value individual sa anti-illegal drug operation alas 3:25 sa kaadlawon, Biyernes, Enero 10, 2025 sa Purok Matinumanon, Brgy. Tabunok, dakbayan sa Talisay.
Ang suspek giila nga si Andy Bacalso Dibuayan alyas Negro, 35, taga Sitio Dawis, Tabunok, Talisay.
Nakuha gikan kaniya ang 75 gramos nga gituohang shabu nga mo balor sa P510,000 ug mga drug paraphernalia.
Duha ka semana nga gipaubos sa monitoring ang suspetsado human madawat ang impormasyon labot sa iyang illegal nga kalihukan.
Giingong maka-dispose si Negro og 100 gramos nga shabu matag semana diin ang iyang area mao ang dakbayan sa Talisay ug syudad sa Sugbo.
Dunay gitug-an ang suspetsado kung asa gikan ang iyang supply sa illegal nga drugas nga gisubay na karon sa kapulisan. / AYB
