Ben Madilynn
Wala matuki hinungdan nga wala maaprubahi sa mga sakop sa hunta probinsiyal sa Sugbo ang gisugyot nga P1,226,620,213 nga supplemental budget, gumikan kay wala ma-quorum ang mga miyembro atol sa special session nga gipatawag niadtong Miyerkules, Mayo 21, 2025.
Ang Supplemental Budget No. 1 alang sa Fiscal year 2025 gipaagi sa usa ka resolusyon nga gipangamahanan ni bokal Michael Joseph “Mike” Villamor, 5th District nga gi-certify nga urgent.
Atol sa special session, sa 18 ka mga miyembro sa hunta, lima lang ang nitunga.
Ang mga nitunga sila si Vice-Governor-elect ug incumbent board member Glenn Anthony Soco, 6th District, Kerrie Keane Shimura, 4th; Mike Villamor, Red Andrei Duterte, 5th; ug bokal Victoria “Tata” Corominas-Toribio, 3rd District.
Samtang wala makatunga sila si 1st District board members Kathleen Daan ug Raul Bacaltos, sa 2nd District sila si bokal Stanley Caminero ug bokal Raymond Joseph Calderon, bokal Atty. John Ismael “Jiembo” Borgonia sa 3rd, Minuel Carmela Franco, 4th District ug Mandaue City Mayor-elect ug incumbent board member sa 6th District Jonkie Ouano.
Wala sab makatambong sila si bokal Jerome Librando ug Cesar “Sarsi” Baricuatro sa ikapitong distrito ingon man ang mga ex-officio members nga sila si Ricardo Pepito sa Philippine Councilors League (PCL), Celestino “Tining” Martinez III, pangulo sa Association of Barangay Council (ABC), ug si Loren Singco, pangulo sa Pambansang Pederasyon ng mga Sangguniang Kabataan (PPSK).
Si Atty. Pulchra Acevedo, Secretariat sa Sangguniang Panglalawigan nipasabot nga kinahanglan nga makaabot sa 10 ka miyembro ang motambong aron ma-quorum ug makapadayon sa pagtuki sa resolution.
Subay niini, usa sa mga bokal sa hunta nga si Atty. John Ismael “Jiembo” Borgonia, 3rd District ang niluwat og pamahayag sa Superbalita Cebu, sa rason og nganong wala siya motunga sa maong sesyon.
“I refuse to be part of a clear evident bad faith for the approval of this supplemental budget amounting to 1.2 billion in total as requested by outgoing Gov. Gwen Garcia that shall clearly hamper the administration of Gov. Pam Baricuatro,” matod ni Borgonia. / ANV
Source: P1.2B nga supplemental budget sa Kapitolyo wala maaprubahi
