Ben Madilynn
Kon way kakulian, maputol na gyud ang kauhaw ni kanhi three-division world boxing champion John Riel Casimero nga makasaka og balik ibabaw sa ring.
Kini human makab-ot ang kasabutan nga ang gitawag og “Quadro Alas” kinsa perming masentro sa kontrobersiya moaway batok sa Latin American contender nga si Saul “The Beast” Sanchez sa ten-round bout karong Oktubre 13, 2024 didto sa Yokohama, Japan.
Ang away kabahin kini sa duha ka adlaw nga multi-world title fights nga magsugod didto sa Ariake Arena sa Tokyo.
Dinhi ipamatuod ni Casimero nga bisan pa man sa kataas sa panahon nga wala siya makaaway, anaa gihapon kaniya ang kalantip ug kahanas.
Tiaw mo bay katapusan niyang away niadto pang Septiyembre 12, 2023 batok sa hapon nga si Yukinori Oguni.
So exactly usa na ka tuig ang iyang pagkahaw-ang, unya ang nakaparat ra ba kay dili impresibo ang resulta niadtong higayona human kini natapos sa technical draw.
Gani gihulagway nga kadto maoy usa sa mga rason kon nganong nikuy-ot ang karisma ni Casimero didto sa Japan ug sa samang higayon, nakapahanap sa iyang tinguha nga makaaway sa Japanese superstar nga si Naoya Inoue.
Sa ato pa, kining pagpakigbatok ni Sanchez maoy iyang opurtunidad nga makapakita og maanindot nga away ug impresibo nga kadaugan aron makabig pagbalik ang kadasig sa mga Japanese boxing fans ug sa mga promoter.
Ang Casimero-Sanchez fight maoy magsilbing supporting bout sa world title bout tali ni Takuma Inoue ug ni Kenshiro Teraji.
Hinuon niadtong Mayo 13, 2023 didto sa Manila, nakapakita og maayong labok si Casimero batok ni Fillipus Nwightumbwa kinsa iyang gipildi pinaagi sa kombinsidong unanimous decision. Iya pang natumba si Nwightumbwa sa ikaunom nga round.
Si Sanchez kinsa adunay 21-3, 12KOs nga record gihulagway nga usa forward fighter nga gituohang makahatag og saktong kalisod ni Casimero sama sa iyang gibuhat sa iyang tulo ka mga inila ug sikat nga mga kontra nga naglakip kang Zolani Tete kinsa iyang gipildi sa ilang WBO bantamweight championship fight sa niaging pipila katuig.
Nisulbong ang pangalan ni Sanchez sa dihang iyang gi-knockout sa first round ang kanhi undefeated American styist nga si Ja Rico O Quinn.
Sa iyang uwahing away, iyang gipildi ang beterano ug Pinoy fighter nga si Arthur Villanueva niadtong Hulyo 17, ning tuiga.
Mao nga bisan tuod og anaa ni Casimero (33-4-1, 22KOs) ang advantage sa eksperiyensiya, dili siya ka siguro ni Sanchez ning away ilabi na kon kuwang siya sa ensaktong ensayo.
