Ben Madilynn
Gihulagway sa kapulisan notadong tulisan nga bag-o lang nakabiktima sa usa ka lalaki sa dalan F. Pacaña, Brgy.Tisa, dakbayan sa Sugbo, pasado alas 3 sa kaadlawon, Dominggo, Septiyembre 22, 2024, nadakpan sa Labangon Police Station human gialarma nga nagdala og armas.
Ang panagway sa suspek nakuha sa footage sa CCTV camera diin kalit kini niabot ug niduol dayon sa naglingkod nga biktima nga si Donvil Ace Bandolon Monterola, 20, residente sa naasoy nga dapit.
Ang suspek nga naka-helmet, naka-sleeveless nga sinina nga color blue ug yellow, dirty white nga short pants, ug nagtsinelas, dayong tion sa dala niini nga armas sa biktima.
Tungod sa kahadlok sa biktima, gihatag na lang ang iyang cellphone nga balor P7,000 ug dali nga misibat ang tulisan sakay sa naghuwat nga Yamaha NMAX nga motorsiklo.
Sa gihimong imbestigasyon sa Labangon Police Station sa pagpangulo ni Police Major Eraño Regidor nailhan lang sa nga JC Abellar, taga Barangay Pasil ug giingong Richard Calunsag alyas “Etchay” nga taga Ermita base sa pamahayag sa mga nakakita sa video.
Apan pagka alas 4:45 sa Dominggo sa hapon, Septiyembre 22, 2024, nakadawat og tawag sa telepono ang Labangon Police Station nga dunay tawo nga armado sa Sitio San Pedro, Barangay Tisa.
Dali nila nga gialarma ug ilang naabtan sa dapit ang suspek nga nagdaladala sa iyang armas.
Sa gihimong pakisusi, giila ang suspek nga si Jessie Cañete, 26, taga Sitio Lawis, Riverside, Barangay Pasil, dakbayan sa Sugbo.
Nakuha gikan kaniya ang usa ka kalibre 45 nga pistola (COLT 1911) nga loaded og duha ka bala sa magazine niini.
Sa paghiling sa iyang bulsa, nakakuha pa ang mga polis og duha ka pakete sa gituohang shabu nga motimbang sa 10 gramos nga dunay standard drug price nga P68,000.
Sa gihimong imbestigasyon sa ilang nadakpan nga armado, kini maoy gitudlo nga nagtulis kang Monterola sa F. Pacaña nga nag-viral sa social media ang CCTV video niini.
Ang armas nga nakuha maoy gigamit sa pagtulis apan wala na makuha pagbalik ang cellphone sa biktima.
Matod ni Regidor, sa ilang pagresponde, dali nga nakasibat ang kauban niini nga si Richard Calunsag, drayber sa motorsiklo.
Dugang ni Regidor nga usa ka notado nga tulisan si Cañete. Gani sa ilang ihap, moabot na sa 20 ka kaso sa pagpanulis ang nahimo niini.
“Notado na kayo ning tawhana kay sa iyang giangkon, mga ka 20 nani nanulis dili lang sa Cebu City apil na sa Talisay. Ang kaning mga biktima nato usahay, tulison bitaw, dili na lang magpa-blotter kay hasulan moadto og estasyon ilabi na cellphone ra puy gipang-igo sa atong na-record,” matod ni Regidor.
Iyang gidugang nga sakop sa usa ka grupo sa mga tulisan si Cañete diin duha ka motor ang gamiton sa pagpanulis.
Giawhag niya kadtong mga nabiktima ni Cañete nga mobisita sa ilang police station aron mapasakaan nilag dugang kaso ang suspek.
Giandam na ang kasong pagpanulis, illegal possession of firearms ug paghupot og illegal nga drugas ang ipasaka sa Labangon Police Station batok sa suspek. / AYB
