No. 4 spot punterya sa Ginebra

Mga duwa karon:

5:00 pm- Converge batok NorthPort

7:30 pm- Phoenix batok Ginebra

Palig-unon og suway sa Brgy. Ginebra Gin Kings ang ilang puwesto sa Top 4 sa ilang pagpakigbatok sa Phoenix Super LPG Fuel Masters sa main game karong Biyernes sa gabii, Mayo 16, 2025, sa Philippine Basketball Association (PBA) Season 49 Philippine Cup sa Philsports Arena sa Pasig City.

Wala pa man tuod nihanoy pagdagan ang ilang kasamtangang kampanya apan nakamaneho ang Gin Kings sa pagpatong sa ikaupat nga luna dala ang 3-2 nga rekord kauban ang Rain or Shine Elasto Painters.

Mahinungdanon ang pagsulod sa Top 4 gumikan kay aduna kini pakapin nga twice-to-beat nga benepisyo sa quarter-finals diin magparang ang No. 1 batok No. 8, No. 2 batok No. 7, No. 3 batok No. 6 ug No. 4 batok NO. 5.

Ning puntoha nga naa na sa tungatungang bahin ang komprensya, wala pa’y nakaseguro og puwesto sa Top 4.

Ang Fuel Masters mas nagkinahanglang nga modaog ning sangkaa kay nagbitay sila sa ikawalo nga puwesto dala ang 2-4 nga rekord.

Sa premirong duwa, magsangka ang Converge FiberXers batok NorthPort Batang Pier.

Ang FiberXers naa sa ikaunom nga luna dala ang 4-3 nga rekord samtang ang Batang Pier nagkumpayot sa ika-10 nga puwesto nga bitbit ang 1-4 nga rekord.

Sa mga duwa niadtong Miyerkules, Mayo 14, gipangmakmak sa league-leader Magnolia Chicken Timplados Hotshots ang Meralco Bolts, 117-92, ug mao sab kini ang gihimo sa NLEX Road Warriors batok sa Terrafirma Dyip, 117-87. / ESL