Naungo sa sugal nga scatter gipapriso sa amo

USA ka tindero ang gipadakop sa iyang amo sa pasangil nga ang halin sa tindahan ug gipangkawat ang stocks nga maoy iyang gipusta sa online sugal nga scatter.

Ang insidente nahitabo niadtong alas 4:00 sa hapon, Martes, Mayo 27, 2025, sa usa ka vape shop sa dalan Englis V. Rama Avenue, Barangay Guadalupe, Siyudad sa Sugbo.

Ang suspek gitago sa alyas nga Marky, 28, adunay kapuyo, ug taga Englis V. Rama Avenue, Barangay Guadalupe. Siya ang gipadakop ni Marc Wilbert Lim See, 35, minyo, ug taga Panganiban, Dakbayan sa Sugbo, tag-iya sa New Life Vapers.

Base sa inisyal nga imbestigasyon nga naaktuhan ni Lim See si Gabucan nga nikawat og P24,000 ug nikuha og mga disposable vapes nga gibutang sa grocery bag nga mobalor og P40,000. 

Sa kinatibuk-ang halin, P7,500 na lang ang narekober gikan kang Gabucan tungod kay nahurot na niya og pusta sa scatter ug ang ubang vapes wala na’y sulod. Tungod niini, gipadakop ang suspek sa iyang amo ug nabalhog sa Guadalupe Police Station.

SORRY 

Sa interbyu sa Superbalita Cebu, si Marky niangkon sa krimen nga matod pa, tungod sa iyang pagkaungo sa online nga sugal nga scatter, nadispalko niya ang halin sa vape. Nagpadayag siya og dakong pagmahay sa iyang gibuhat.

Gidugang ni Gabucan nga ikaduha na kini niyang higayon nga nasakpan sa iyang amo. Niadtong miaging tuig, nakadispalko na siya og P300,000 nga halin sa vapes apan gipasaylo siya sa iyang amo ug gipabayad pinaagi sa salary deduction. 

Sa ikaduhang higayon, nangayo siya og pasaylo ug nanghinaot nga pasayluon pag-usab tungod kay gagmay pa ang iyang mga anak.

PANDEMIC

Gibutyag ni Gabucan nga nagsugod siya pagkaungo sa scatter human sa pandemya, apan labing nagkagrabe ang iyang pagkaungo sa maong sugal sa milabay nga tuig. Matod niya, matag adlaw dako kaayo siya og pilde nga moabot og P10,000. Kon suwertihon, iyang mataplan ang halin sa tindahan nga iyang gikuha. Apan kon mapilde, mangawat na sab siya sa halin aron ipusta.

Naagni siya sa online nga sugal human makadaog og P750,000 sa miaging tuig.

Sigon niya, kon modaog malingaw ka, apan kon dili ka moundang kay moapas og jackpot prize de malas. Apan sa iyang kwentada, mas daghan gyud ang iyang pilde kaysa daog.

“Walay kabutangan sa akong pagmahay pero unsaon ta man naa na man ni, atong dawaton,” matod ni Marky. Alang kaniya, dili gyud makaayo ang sugal kay gikan sa ginagmay, moabot sa dinagko nga pusta apan alkansi gihapon. Nanawagan siya sa ubang manugal sa scatter nga mohunong na samtang madala pa. Kasong qualified theft ang atubangon sa dinakpan. / GPL