Natakdan sa ‘STD’ kapuyo gidagmalan

HELPER napriso kay nanagmal sa kapuyo nga menor de edad nga gipasanginlang “nasira niya” niadtong  Dominggo sa gabii, Hunyo 1, 2025, sa usa ka Barangay sa Lungsod sa Sibonga. 

Si Ron-Ron,18, helper sa usa ka hardware gitanggong sa Sibonga Police Station samtang ang nireklamo mao ang 16-anyos niya nga kapuyo nga si alyas Myrna, taga Dakbayan sa Carcar.

Si Ron-Ron niangkon sa iyang sayop nga nahimo apan nangatarungan nga wala niya dagmali iyang kapuyo.

Iya sab nga gihimakak nga gidagmalan niya ang 10 ka bulan nga bata nga anak sa iyang kapuyo. Nahitabo ang ilang panaglalis ug natapi niya og hinay ang bukton ni Myrna.

Gibutyag niini nga nasuko siya kay nagsipok iyang ulo niadtong Dominggo sa gabii sa kalagot.

Matod niya nga niadtong Dominggo sa udto naghilawas siya sa iyang kapuyo apan nianang pagkagabii, gihilantan siya ug naglabad ang iyang ulo.

Sakit ang iyang pagpangihi hinungdan nga nagduda siyang ‘nasira’ ug ang iyang kapuyo ang iyang gipasanginlan nga nakatakod kaniya.

Nagduda siyang dunay laing karelasyon ang iyang kapuyo apan wala siyay ebidensya.

Pirme silang maglalis kay badlungon niya ang iyang kapuyo nga magsige og sul-ob og pakigol samtang daghang mga batan-on ang manan-aw.

Kasong kalapasan sa  Violence Against Women and Children’s Act ubos sa RA 9262 in relation to RA.7610 ang ipasaka batok sa suspek. / GPL