Nasurok 300 a pasahero nga agturong idiay Estados Unidos, natalgedden ti kasasaadda kalpasan ti technical glitch ti eroplano a naglugananda

LAOAG CITY – Addan iti natalged a kasasaad dagiti 361 a pasahero manipud iti eroplano ti Philippine Air Line nga agbiahe idiay America kalpasan a nakapasarda ti technical glitch idi rabii ti Biernes, Hulio 5.

Segun kenni Philippine Air Line  spokesperson Cielo Villaluna, saan a nakapag-take-off ti Philippine Air Line flight 102 nga agturong idiay Los Angeles, California kalpasan a nadlaw ti piloto ti technical problem iti taxiway ti Ninoy Aquino International Airport (NAIA) runway.

Nagideploy met ti Manila International Airport Authority (MIAA) kadagiti bombero iti nakapasamakan ti insidente kalpasan a naduktalan a ti asuk ket naggapu iti eroplano.

Insigida met a naguyod ti eroplano manipud iti runway ti eropuerto ken naasikaso met a dagus ti kasukat nga eroplano kadagiti pasahero.

Malaksid iti daytoy ket nangipaay ti kompania ti eroplano ti taraon ken pagdagusan ti amin a pasahero a nataktak ti flight na.

Kabayatanna, nagpadispensar met ti management ti Philippine Air Line  kadagiti naapektaran a pasahero gapu iti malfunction.