Ben Madilynn
NIRESULTA sa pinusilay ang pagpangdagit sa usa ka lalaki tali sa nirespondeng mga awtoridad sa may gasoline station sa Bypass Road, kanto Bukidnon Road, Km. 11, Barangay Catalunan Pequeño, Davao City alas 12:30 sa udto, Martes, Septiyembre 4, 2024.
Giila ang suspek nga si alyas Sator, hamtong ang pangedaron, kasamtangang nagpuyo sa Block 14, Lot 23, Wellspring Village 2, sa nahisgutang barangay.
Sa sketchy report sa Davao City Police Office, nasayran nga nahimong biktima sa pagpangdagit si alyas Sabejon, hamtong ang pangedaron, dalaga, ug molupyo sa Block 14, Lot 23, Wellspring Village 2 sa mao gihapong barangay.
Samtang usa ka Ian Regner, 24-anyos, ulitawo, self-employed, ug molupyo sa Pag-Ibig, Barangay Catalunan Pequeño ning siyudad giingong napagan sa insidente human mabanggai matud pa sa motorsiklo sa suspek.
Sumala pa sa taho nga mga sakop sa kapulisan, uban ang Special Weapons and Tactics (SWAT) Team sa DCPO, niresponde sa tawag sa giingong hostage taking nga nahitabo sa maong dapit.
Gihimo gilayon ang negosasyon sa mga pulis ngadto sa suspek apan inay nga maminaw ug motahan, giingong nisukol na hinuon kini ug nagpabuto sa dala niining armas hinungdan nga napugos ang mga pulis sa pagbawos og pabuto hinungdan sa pagkaangol sa suspek.
Ang suspek ug ang giingong napagan nga biktima gidali pagdala ngadto sa balay tambalanan alang sa medikasyon.
Sa uwahing katikaran kagahapon sa hapon, gibutyag ni DCPO spokesperson Hazel Tuazon nga patay na ang suspek samtang luwas na ang napagan nga biktima. (Wenz G. Mendoza)
