Ben Madilynn
GIHULAGWAY sa Commission on Elections (Comelec) 7 nga malampuson ang 2025 midterm elections tungod kay daghan ang nibotar, minos ang insidente nga may kalabutan sa eleksiyon, ug hapsay nga koordinasyon tali sa mga ahensiya sa gobiyerno.
Atol sa Exit Conference sa Regional Joint Security Control Center (RJSCC) 7 sa Cebu City niadtong Hunyo 3, 2025, gipresentar ni Comelec 7 Director Francisco Pobe ang comparative nga datos alang sa 2019, 2022, ug 2025 nga eleksiyon.
Sa 2025 nga eleksyon, ang rehiyon nakatala og 86.52 porsiyento nga ihap sa nibotar nga nilapas sa projection sa Comelec nga 75–80 porsiyento.
Sa 4,389,344 ka rehistradong botante sa Central Visayas, 3,797,563 ang nibotar.
Matod ni Pobe nga ang makanunayong pagsaka sa pag-apil sa eleksiyon nagpakita sa dugang nga civic engagement ug political maturity sa mga botante.
Iyang gitumbok ang taas nga daghan ang nibotar sa hiningusgan nga kampanya sa pagpahibalo sa publiko, sa sayo nga pagbotar, ug ang pilot nga paggamit sa mall voting sa pipila ka presinto.
Sa 2019 midterm elections, ang Central Visayas adunay 79.75 porsiyento nga nibotar.
Gikan sa 4,946,261 ka rehistradong botante, 3,944,864 ang nibotar.
Kini nga porsiyento nisaka og dako sa 2022 Presidential elections nga niabot og 85.03 porsiyento.
Sa 2022, 4,463,105 ka botan-te ang nibotar gikan sa kinatibuk-an nga 5,249,066 nga rehistrado.
“What is significant is that we are going to look at the elections in 2019 and 2025 because these are midterm elections… There is a big disparity in the results,” matod ni Pobe.
Ang rehiyon nakasinati og pagkunhod sa kinatibuk-ang rehistradong botante alang sa 2025 nga eleksiyon tungod kay ang datos sa 2019 ug 2022 naglakip sa mga botante gikan sa Siquijor ug Negros Oriental Province, sa wala pa gimugna ang Negros Island Region.
Samtang, gipahibalo ni Pobe ang tentative nga schedule alang sa Barangay ug Sangguniang Kabataan (SK) Elections, pending sa aksiyon sa Kongreso sa posibleng mga paglangan:
○ Pagparehistro sa Botante: Hulyo 1–11, 2025
○ Pagsumite sa Kandidatura: Oktubre 1–7, 2025
○ Panahon sa Kampanya: Nobiyembre 20–29, 2025
○ Adlaw sa Eleksiyon: Disyembre 1, 2025. / EHP
Source: Nagmalampuson ang Mayo 12, 2025 nga piniliay
