Nagduduma nga aktibidad, maiyuswat para iti 2024 Nutrition Month ita a bulan

LAOAG CITY – Naiget a suportaran ti gobierno probinsial ti Ilocos Norte iti maika-50 a selebrasion ti Nutrition Month ditoy pagilian babaen iti pannakaiyuswat dagiti nagduduma nga aktibidad kas pannakaselebrar iti 2024 Nutrition Month ita a bulan ti Hulio.

Daytoy ket babaen iti panangidaulo ti Provincial Nutrition Action Office wenno PNAO.

Segun ken ni Ms. Elma Irapta, mangidadaulo iti nasao a pangopisinaan, ti tema ita a tawen ket “Sama-sama sa nutrisyon sapat para sa lahat.”

Inbatadna a saan a nasken a maisardeng ti panangipalagip iti publiko maipapan iti kinapateg ti panangtaripato iti salun-at nangruna iti panangliklik iti unhealthy lifestyle.

Kunana nga adda ti inorganisarda a Community Outreach Program ken ti maaw-awagan a Biggest Loser.

Inlawlawagna a ti nasao a programa ket binukel dagiti member agencies iti Provincial Nutrition Committee ken dadduma nga stakeholders nga agkalikagum a mangisuro dagiti problema ti salun-at kadagiti komunidad.

Inpakaammona a ti Biggest Loser ket a maysa a wagas tapno ad-adda pay a magutigot dagiti Ilokano a pagtalinaeden ti healthy lifestyle babaen iti panagmentenar iti nasalun-at a timbang tapno malimitaran ti risgo a mangitunda ti chronic diseases pakairamanan ti Type 2 diabetes, heart disease, stroke ken dadduma pay a klase ti kanser.

Innayonna ti panangipasingked ti opisinada iti agtultuloy a Supplementary Feeding Program para kadagiti pre schoolers ken dagiti masikog tapno mapagtalinaed ti nababa a kaso ti stunting ditoy probinsia.