Ben Madilynn
Napalgan ang usa ka guwardiya nga patay nang nagbuy-od sa iyang puwesto sa alas 3:40 sa kaadlawon, Martes, Septiyembre 10, 2024 sud sa warehouse nga iyang gibantayan sa Arellano Boulevard, Barangay Carreta, Dakbayan sa Sugbo.
Ang namatay gitago lang sa alyas nga Teo, 44, ug lumad nga taga Tacloban City.
Ang mga sakop sa Mabolo Police Station ang mirespondi sa lugar human nga nakadawat og tawag sa alas 7:37 sa buntag sa kalabot sa napalgan nga patay.
Si Police Major Romeo Caacoy Jr., hepe sa Mabolo Police Station, nagkanayon sa dihang nahinabi sa Superbalita Cebu nga ila pang gipaabot ang resulta sa autopsy aron sa pagsuta sa tinuoray nga hinungdan sa kamatayon sa maong guwardiya.
Bisan pa man nagtuo sa kapulisan nga natural cause lang ang kamatayon ni Teo.
Usa sa mga trabahante warehouse nga alyas Joe Black ang misaysay ngadto sa mga tigbalita nga way tarong kinatulgan si Teo.
Giingong naungo siya sa online sugal nga ‘scatter’ bisan sa oras tingtrabaho.
Matod pa nga kanunay’ng mabuntagan sa pagduwa si Teo nga usa sa rason nga naputos kini sa utang, hinungdan nga magbilar kini og duwa aron nga makabawi ug ang iyang madag-an iya ra sab nga ibayad sa iyang giutangan.
Nitumaw sab ang giingon nga moabot na ngadto sa P27,000 ang utang ni Teo ug adunay mga nagpunay sa panawag kaniya kay maningil.
Gidudahan nga gi-atake si Teo gumikan kay kuwang sa pahuway.
Dugang pa ni Joe Black nga sa milabayng gabii moabot sa P5,000 ang pilde ni Teo nga iyang gikaguol.
Gisultihan sab siya sa maong guwardiya nga adunay higayon nga nakada-og siya og P2,000, sa iyang pusta nga tag-P10 sa matag duwa. / GPL
