‘Nadakin-as’ sa riprap, namatay

NAKABSAN sa iyang kinabuhi ang usa ka senior citizen nga gituohang natagak sa sapa ug napalgan niadtong buntag sa Huwebes, Hunyo 12, 2025 sa Sityo Lower Pailub, Barangay Sambag 2, Dakbayan sa Sugbo.

Ang biktima gituohang nahulog gikan sa riprap kilid sa sapa nga adunay duha ngadto sa tulo ka metros ang gitas-on. 

Ang namatay nailhan nga si Wilfredo Sacay o nailhan sa maong dapit nga “Blue eyes” tungod kay matod pa duna kini blue nga mata, 62, ulitawo ug residente sa maong dapit. 

Matod sa mga silingan, dunay usa ka residente sa maong dapit nga maglabay unta og bahaw nga kan-on mga alas 6:00 sa buntag ngadto sa sapa apan nakurat nalang kini dihang nakit-an niya si Sacay sa tunga nga bahin sa sapa nga wala na galihok hinungdan nga gitawag ang igsuon niini.

Si Eduardo Sacay,manghod sa maong biktima, nibutyag nga dali siyang nidulhog sa sapa ug nakit-an iyang maguwang nga gahayang, iya kining gibira paingon sa daplin ug gisuwayan sa pagtabang.

Nibutyag si FO3 Nick Philip Geronimo,team leader sa BFP Special Rescue Force Region 7, dihang gisusi nila ang biktima naa kini samad sa agtang ug wala na kini gaginhawa apan gisuwayan pa kini nilag revive.

“Naa siyay murag dugo sa iyang agtang pero mao lagi to gamay ra,wala pa kaayoy nakuan pud ang atoang EMS pud sa iyang pag assess. Ang iya lang pagkanaog didto is wala na siya ka feel og pulse.” asoy ni Geronimo.

Ang kapulisan sa Abellana nakadawat og tawag gikan sa tanod sa Sambag 2 mga alas 9:36 sa buntag nga nagpahibawo nga dunay tawo nga nakit-an sa sapa nga wala na galihok .

Gipadad-an og imbistigador sa kapulisan ang dapit apan nakuha na ang biktima ug gidala sa mga sakop sa BFP sa Cebu City Medical Center.

Sa imbistigasyon ni PSSg Jerramel Cansancio nasayran gikan sa igsuon sa biktima nga si Eduardo nga ang iyang maguwang usa ka Person with Disability (PWD), usa ka amang ug dunay cataract hinungdan nga maglisud na kini og kakita.

Gidala sa tambalanan ang maong biktima apan gideklarar sa attending physician nga patay na.

 Nidugang usab si Eduardo nga katapusan niyang nakit-an iyang maguwang gabii sa Hunyo 11,2025 ug iyang pagtuo nga nangihi kini sa nahitabuan ug natagak. / JDG