Ben Madilynn
Motorsiklo nawad-an og brake nga niresulta sa kamatayon sa drayber samtang ang angkas naangol, alas 2:55 sa hapon, Lunes Septiyembre 16, 2024, sa barangay road sa Sitio Upper Cambotete, Barangay Luka, lungsod sa Oslob.
Si Rolando Dival, 45, dunay kapuyo, drayber sa motorsiklo ug taga Brgy. Daanlungsod, gideklarar nga dead on arrival (DOA) sa ospital.
Naangol iyang angkas nga si Jose Catipay Regudo Jr., silingan sa namatay.
Si Police Staff Sgt. Chito Undag, imbestigador sa Oslob Police Station nga nahinabi sa Superbalita Cebu niingon nga ang mga biktima paduÂlong magpalit og materyales sa paghimog puso sa tubig.
Samtang nagdulhog ang motorsiklo, mipahibalo ang namatay nga driver nga nawad-ag sila og brake.
Ang angkas nipadayag nga isum-ok nalang sa daplin sa karsada, pero naapike ang drayber kay nakabuylo na sa pagdagan ang motorsiklo.
Katunga na sila sa karsada nga may dulhogong 200 metros. Nalahos sila sa ubos nga dunay kurbada ug nabangga sa poste sa kuryente.
Ang mga biktima nangalagpot ug nakaangkon og grabing kadaot sa kalawasan.
Ang motorsiklo nahagbong sa pangpang nga may gilawmon nga 10 ngadto sa 20 metros.
Gidali sila sa pagdala sa tambalanan apan DOA ang driver.
Ang angkas gibalhin sa tambalanan sa Dakbayan sa Sugbu alas 7:00 sa buntag Martes./GPL
