Ben Madilynn
Ang motorsiklo nga maoy gamiton sa pagpanulis sa grupo ni Jessie Cañete ang nakuha na sa Labangon Police Station nga giabandonar sa usa ka parking lot sa Barangay Ermita, Dakbayan sa Sugbo, Dominggo sa gabii, Septiyembre 22, 2024.
Matod ni Police Major Eraño Regidor, hepe sa Labangon Police Station, nga nitug-an si Cañete kung asa i-parking ang maong motor nga maoy ilang gisakyan atol sa pagpanulis nila sa dalan F. Pacaña, Barangay Tisa niadtong Dominggo sa kaadlawon.
Dali nga giadto sa mga imbestigador ang dapit ug ilang natultolan ang parkinganan sa daghang mga motor lakip na ang yawe niini.
Bisan kinsa lang matod pa ang mogamit sa maong motorsiklo nga mga tulisan nga sakop ni alyas Etchay nga naila sa ngan nga Richard Calunsag.
Giangkon matod pa ni Cañete nga walo silang sakop sa usa ka grupo nga mga tulisan nga pulos mga drayber sa e-bike.
“Pulos ni sila taga Cebu City nga in fact pulos ni sila mga ebike driver, ebike driver sila mabuntag nya inigka gabii mo sideline silag panulis,” matod ni Regidor.
Duna pay gipangtug-an si Cañete kung kinsa ang iyang mga kauban ug kung asa sila magtapok panahon nga magdungan silag gawas aron manulis.
Nagpadayon ang gilusad nga manhunt sa Labangon police batok sa lima pa ka kauban niini uban sa laing unit sa kapulisan sa Central Visayas.
Sa miaging buwan lang sila nagsugod sa ilang modus diin ang ilang target mao kadtong mga tawo nga nag-inusara diha sa daplin sa dan./AYB
