Ben Madilynn
Nitahan sa usa ka komentarista sa sibyaanan sa radyo ang usa ka lalaki nga nabalaka sa iyang seguridad kay gipasanginlan nga maoy nibaligya sa gikawat nga e-bike nga iya sa usa ka polis.
Nidangop kang Atty. Ruphil Fernandez Bañoc, station manager ug komentarista sa sibyaanang DyHP RMN Cebu, ang mao nga lalaki tungod sa kahadlok nga dunay mahitabo kaniya human siya gitudlo nga nibaligya sa E-Bike nga gikawat sa milabayng semana sa dakbayan sa Naga nga iya sa usa ka polis.
Ang nitahan mao si Mario Canonigo, hingkod, taga Sitio Happy Valley, Barangay West Población, dakbayan sa Naga.
Matod ni Mario nga niadtong Hunyo 26, 2024 adunay mga polis nga nangita niya sa ilang balay human nadakpan ang duha ka magsuon nga silang alyas Dandan ug alyas Ronald nga iyang mga silingan ug iyang ig-agaw nga si alyas Joshua nga mao matod pa ang ningkawat sa E-Bike sa polis.
Tungod sa kahadlok nga dunay mahitabo kaniya wala na siya nipauli sa ilang balay sa Barangay West Población.
Siya ang gitudlo sa magsuon nga maoy nibaligya sa E-Bike sa Duljo Fatima, dakbayan sa Sugbo nga hugtanon niyang gipanghimakak.
Giangkon ni Mario nga iyang gibadlong ang duha nga dili himuon ang krimen kay lisod kaayo kon mapriso.
Matod niya nga siyam ka tuig siya nga nabilanggo sa kasong robbery ug niadtong 2023 lang nakagawas.
Gani ubos pa siya sa probation sa korte nga maoy naghawid sa iyang kaso.
Masaligon siya nga walay mahitabo kaniya kon mo-surrender siya kang Bañoc nga iyang gi-idolo.
“Gusto nako nga makahibalo ang mga polis sa Naga nga niboluntaryo ko nga mi-surrender diri sa DyHP pinaagi kang Atty. Ruphil Bañoc. Akong paghangyo sa akong pag surrender walay dautang mahitabo sa akong lawas, Sir,” matod ni Canonigo.
Nabalaka siya nga pasakitan sa mga polis sa Naga human makadawat og impormasyon nga ang tulo niya ka mga silingan pulos giingong gipangkulata.
Giturn-over hinuon sa DyHP si Canonigo sa Naga City Police Station sa pagpangulo ni Bañoc aron iproseso ang iyang kaso.
Gipasalig sa mga polis sa Naga nga dili siya pasakitan.
Gani ipaubos siya sa medical checkup aron pagsiguro nga naa sa kondisyon ang lawas niini sa dili pa siya dad-on sa police station. / AYB
