Ben Madilynn
Patay ang usa ka 43 anyos nga lalaki human nakigpinusilay sa kapulisan sa Barangay Taloot, lungsod sa Argao, alas 6:30 sa buntag, Biyernes, Agusto 30, 2024.
Ang namatay giila nga si Danilo Gula Rafaela, 43, ulitawo, ug taga Brgy. Taloot, Argao.
Ang kapulisan sa Argao, ubos sa kamandoan sa ilang hepe nga si P/Maj. Janus Giangan, nirespondihan sa alarma nga dunay armadong tawo nga nagpabuto og armas sa naasoy nga dapit.
Sa pakisusi sa Superbalita Cebu nasuta nga ang kapulisan nakadawat og tawag gikan sa usa ka concerned citizen bahin sa alarma sa pagpabuto og armas.
Sa pag-abot sa kapulisan sa Taloot, nakit-an ang suspek nga nagdala og pusil ug ila kining gikomprontasi uban sa pagpaila sa kapulisan apan nisukol na hinuon kini nga naresulta sa engkwentro.
Apan ang suspek naigo sa kapulisan ug namatay dihadiha samtang ang dapit nga nahitabo giproseso na sa mga saop sa Scene of the Crime Operation (Soco). /DVG
