Ben Madilynn
Lalaki nga gituohang sabog sa illegal nga drugas ang naglatay-latay sa atop sa mga kabalayan sa Sityo Catalina, Barangay Lahug, Dakbayan sa Sugbo, alas 7:30 sa gabii, Martes, Septiyembre 10, 2024.
Naukay ang mga residente sa maong lugar gumikan sa kasaba ug nagsige kinig yawyaw samtang naglatay-latay sa mga atop.
Dali nga miresponde ang duha ka beat patrollers nga sakop sa Cebu City Mobile Force Company ug ilang naabtan ang suspek nga nailhan nga si Daryl Siasico Eguia, 22, construction worker, residente sa Sityo Kawayanan, Barangay Lahug, Dakbayan sa Sugbo.
Miresponde usab ang mga personnel sa Bureau of Fire Protection Emergency Medical Services kay mihulga nga moambak aron maghikog.
Human nga nakumbinser nila ni Police Patrolman Jherson Kile Rosales ug Patrolman Michael Kent Pacaña ila dayon kini nga gidala sa Mabolo Police Station.
Sa interview sa media ngadto ni Daryl iyang giangkon nga nisaka siya sa mga atop sa kabalayan sa maong lugar tungod kay adunay mopatay niya.
Giangkon usab niya nga nakasuyop siya og shabu sa wala pa siya mosaka sa atop ug nakadungog og estorya nga adunay mopatay niya.
“Naay nagbayad nga patyon ko nga dakodako ang bayad so kung mogawas ko naghinam-hinam na sad ang mga tawo nako, patyon ko nila ba,” matod ni Daryl Eguia.
Tinguha na usab niya nga mag kutlo sa kinabuhi tungod sa kadaghang problema.
Dugang ni Daryl nga nag gal-gal ra siya sa iyang mga amigo nga mogamit sa illegal nga drugas.
Gisubay sa Mabolo Police Station 4 kon aduna bay record si Daryl ug giandam na sab ang kasong Alarm and Scandal batok sa suspetsado. / AYB
