Mikulata sa kapuyo atubangan sa ilang mga bisita, gipapriso

NAWINGIG ang nawong sa 18-anyos nga inahan human gisumbag sa iyang kapuyo nga hubog alas 6:00 sa gabii sa Sabado, Hunyo 7, 2025, sa Purok Riverside 1, Barangay Balirong, Dakbayan sa Naga.

Si Venz Rumel Camaso Gorgonio, alyas Gorgo, 20, construction worker, nagpuyo sa nahisgutang lugar napusasan sa kapulisan niadtong Dominggo sa gabii human ni-report ang biktimang kapuyo nga si Sunday Rose Chu Uy.

Sa imbestigasyon sa mga personnel sa Naga Police Station, nasayran nga nagpabunyag ang biktima ug ang suspek sa ilang anak lalaki nga lima na ka bulan.

Nahubog na ang suspek niadtong higayona ug nihilak ang bata kay gigutom .

Nasuko ang suspek kay gibiyaan sa inahan kay nisulod sa ilang lawak kay dunay gikuha.

Tungod niini, gisumbag ni Gorgo ang nawong ni Uy makatulo ka higayon atubangan sa ilang mga higala, bisita, ninong ug ninang sa bata.

Apan human gipapriso, gi-bu-hian sa kapulisan ang suspek sa Lunes sa hapon kay nag-dalag affidavit og desistance ang biktima.

Kaluoy maoy nipatigbabaw sa biktima hinungdan nga gipabuhian ang iyang kapuyo. / GPL