Mga mangingisda sa CV gipasidunggan

Kapin sa 70 ka mga mangingisda gikan sa tibuok Central Visayas ang gipasidunggan karong semanaha sa Bureau of Fisheries and Aquatic Resources (Bfar)7 nunot sa pagtapos sa kasaulogan sa “Farmers and Fisherfolks month.”

Gipasidunggan sila dili lang tungod sa ilang inadlaw nga kontribusyon sa seguridad sa pagkaon, apan usab sa ilang kahanas sa pagnegosyo ug mga talento sa kultura.

Gipahigayon kini sa Bfar 7 Regional Office sa Cebu City niadtong Mayo 29–30, ang culminating event nagpakita sa mga regional contest sa balak, quiz bee, poster making, pag-awit, pagluto, ug pagpanahi og pukot, usa ka plataporma aron ipasundayag ang kahanas ug pagkamamugnaon sa mga mangingisda gawas sa dagat.

Ang mga nangapil mao ang mga top winner gikan sa mga provincial competition sa Cebu, Bohol, Negros Oriental, ug Siquijor.

Si Public Information Officer Jose “Jun” Arro niingon nga ang selebrasyon molapas sa tradisyon, kini mahitungod sa empowerment ug visibility.

Sa samang kalihukan, gipahigayon ang usa ka Kadiwa ng Pangulo market fair nga nagpakita sa mga presko ug giprosesong produkto direkta gikan sa mga mag-uuma, mangingisda, ug mga Micro, Small, ug Medium Enterprises (MSMEs) nga gitabangan sa BFAR.

Lakip sa mga gibaligya mao ang preskong tilapia, bangus, pasayan, scallops, uga nga isda, “asin tibuok,” banana chips, binotelyang ginamos, moringa products, ug uban pa, tanan gitanyag sa presyo sa farmgate.

Kapin sa 21 ka MSMEs ang niapil sa fair, usa ka panag-alayon sa mga partner agencies sama sa Department of Agriculture-Agribusiness and Marketing Assistance Division (DA-AMAD) ug ang Enhance Partnership Against Hunger and Poverty (EPAHP) program sa DSWD.

“This celebration is part of our continuing effort to elevate the fisheries sector and support small-scale entrepreneurs. By connecting them directly to buyers, we are helping improve household incomes and promote access to affordable, locally-sourced food,” dugang ni Arro.

Gipadala usab ni Arro ang usa ka mensahe gikan sa Bfar 7 Director Dr. Allan Poquita ug iyang gipasidunggan ang mga mangingisda ug mag-uuma sa rehiyon.

Unang gilusad niadtong 2017 ang Farmers and Fisherfolk Month pinaagi sa lokal nga Tienda o Tabo initiatives, sa BFAR 7 ug nagpadayon dili lang alang sa pagpasidungog, kon dili alang usab sa tinuod nga epekto sa ekonomiya — ngadto sa empowerment. / CDF