MCPO motukod og command center aron mas paspas pagtubag ..

Aron pagsuporta sa kamanduan sa Philippine National Police (PNP) nga palig-unon ang pagtubag sa mga emerhensya, ang Mandaue City Police Office (MCPO) naningkamot nga makatukod og kaugalingong command center sa ilang headquarter aron mapalambo ang koordinasyon sa operasyon ug mapakunhod ang oras sa pagtubag.

Gibutyag ni MCPO spokesperson Lt. Col. Mercy Villaro nga ang pasilidad gisugyot aron suportahan ang ilang tumong nga makab-ot ang 3-minutos nga response time sa mga emerhensya ug insidente sulod sa siyudad, usa ka lakang nga nahiuyon sa direktiba sa bag-ong PNP Chief Gen. Nicolas Torre III.

Si Gen. Torre sa sayo pa nimando sa tanang unit sa PNP sa tibuok nasod nga limitahan ang oras sa pagtubag sa emerhensya ngadto sa tulo ka minuto lamang, ipatuman ang walo ka oras nga pagbalhin-balhin sa trabaho sa mga personnel ug mohimo og tinud-anay nga imbentaryo sa kagamitan sa kapulisan aron masiguro ang kaandam.

Aron makakuha og mga ideya sa pagpahimutang sa gisugyot nga command center, si Villaro bag-o lang nibisita sa City Disaster Risk Reduction and Management Office (CDRRMO) niadtong Miyerkules, Hunyo 4, aron pagtimbang-timbang sa operasyon sa pasilidad ug pagtino kung unsang kagamitan ug sistema ang gikinahanglan.

“We looked for best practices and checked what equipment was needed so that the MCPO can start monitoring CCTVs in various areas of the city,” matod ni Villaro.

Gipasabot niya nga samtang ang kapulisan sa pagkakaron adunay shared access sa CCTV network sa CDRRMO, ang usa ka independenteng command center makapahimo sa real-time nga pag-monitor, mas paspas nga koordinasyon, ug mas daling pag-deploy sa mga unit atol sa mga emerhensya.

Dugang niya nga nagtuo sila nga gikinahanglan ang pagbaton og kaugalingong command center aron mas sayon ang koordinasyon ug mas paspas ang pagtubag.

Ang sugyot pormal nga isumiter ngadto sa kagamhanan sa siyudad, nga maoy mobutang og pundo sa proyekto.

Naglaum si Villaro nga sa higayon nga maaprobahan ang sugyot, ang command center makapalambo og dako sa pagpakita sa kapulisan, kahibalo sa sitwasyon, ug tukmang pagtubag sa tibuok Mandaue City. / CAV