Maysa a tao, mapukpukaw, walo a dadduma, nadundunor iti panagduprak ti Bagyong Julian idiay Northern Luzon
Ben Madilynn
Maysa a tao ti naipadamag a mapukpukaw bayat a walo a dadduma pay ti nadundunor iti panagduprak ti Bagyong Julian idiay Northern Luzon.
Iti datos manipud iti National Disaster Risk Reduction and Management Council (NDRMMC) idi Kalman, aldaw ti Mierkoles, impadamag ti ahensia nga ti mapukpukaw nga indibidual ket maysa a 38-anyos a lalaki manipud iti Barangay Cabcaborao, ili ti San Juan, probinsia ti Abra, kalpasan a naiyanud babaen ti napigsa nga ayus ti danum idiay Tineg River.
Idinto a dagiti walo a nasugatan ket sadiay Basco, Batanes, a nakaro ti pannakasaplit ti napigsa nga angin ken tudo nga inyeg ti bagyo.
Segun iti nasao nga ahensia, nasurok a 43,000 a pamilia wenno nasurok 149,000 nga indibidual ti apektado iti panangdadael ti bagyo iti Ilocos Region, Cagayan valley ken Cordillera Administrative Region.
Adda pay 88 a balbalay a nadadael idiay Ilocos Norte, Ilocos Sur, La Union, Cagayan, Abra, Benguet, Ifugao ken Mountain Province.
