Mayor MMK, inpasingkedna ti 100% a suportana para kadagiti mannalon ken mangngalap ditoy siudad ti Laoag
abyasa
LAOAG CITY – Inpasingked ni Mayor Michael Marcos Keon ti 100 a porsiento a suportana para kadagiti mannalon ken mangngalap ditoy siudad ti Laoag.
Segun kenkuana, mamati daytoy nga iti benneg ti agrikultura iti kapapatgan kadagupan kadagiti dadduma a sektor gapu ta no awan ti agrikultura ket awan ti maidasar iti lamisaan para iti inaldaw-aldaw a panagbiag.
Inbatadna a nasken laeng a maipangpangruna ti pagimbagan para kadagiti mannalon tapno mapagtalinaed ti food security ditoy siudad.
Kunana a nakasagana ti lokal a gobierno ditoy siudad ti Laoag a mangipaay kadagiti kasapulan dagiti maseknan a mannalon ken mangngalap babaen iti panangidaulo ni Engr. Shiela Opelac, mangidadaulo ti City Agriculture Office.
Innayonna a saan a mabalin nga ilanglangi ken baybay-an ti kiddaw dagiti mannalon ken mangngalap gapu ta dakkel nga epekto iti merkado ken komunidad no dagitoy ti makapasar ti kinarigat iti panagtalon ken panagmula kadagiti produkto agrikultura.
