Mangingihaw og baboy sikop sa buy-bust sa Tagbilaran

Mangingihaw og baboy ang gipusasan sa kapulisan atol sa buy-bust sa Upper Sto. Niño, Purok 2, Barangay Dao sa Dakbayan sa Tagbilaran, Lalawigan sa Bohol, sa alas 11:06 sa gabii, Miyerkules, Mayo 28, 2025.

Ang suspek giila nga si alyas Rey, 47, nga taga Pagina Seawall ,Lungsod sa Jagna.

Nakuha gikan kaniya ang lima ka putos sa gituohang shabu nga motimbang sa 25 gramos nga mobalor og P170 mil.

Matod ni Police Lieutenant Colonel John Kareen Escober, ang hepe sa Tagbilaran City Police Station, nga usa ka buwan nila nga gi-monitor ang suspek.

Human nila makuha ang tanang impormasyon, gilusad dayon ang buy-bust sa City Drug Enforcement Team nga miresulta sa pagkasikop sa suspek.

Giingon’g makabaligya si Rey og 50 gramos nga shabu matag semana diin ang iyang area sa distribution mao ang tibuok Siyudad sa Tagbilaran ug mga silingang lungsod. / AYB