Mario Bautista
Natalek ni Senate Majority Leader Francis Tolentino a dakkel ti tsansa a maaprobaran iti Senado ti singasing a pannakaisubli ti Mandatory ROTC kadagiti kolehio.
Daytoy ket gapu ta kunana a nangted ni Presidente Ferdinand Marcos Jr. ti go signal tapno mapadaras ti diskusion ti singasing, kalpasan a nailawlawag kenkuana ti panggep ti singasing.
Segun ken ni Tolentino, kayatna a sawen a mairugi manen ti deliberasion iti nasao a singasing iti plenario ti Senado kalpasan ti maysa a bulan a break ti Kongreso.
Patien ti senador a ti laeng nabati a risuten dagiti senador ket ti probision no maaramid ti programa iti maysa wenno dua a tawen.
Insingasing ti agpapanday-linteg, ti mabalin nga umuna nga aramiden ag-focus iti basic course, bayat nga advanced training iti maikadua a tawen.
Para kadagiti kadete a kayatda ti agtuloy iti panagsanay, mabalin ti mangipaay iti curriculum ti Executive ROTC.
Daytoy a singasing ket naaprobaran iti Kamara bayat nga iti Senado ket adda iti period of interpellation.
