Ben Madilynn
ATRASO ang gilantaw sa mga awtoridad sa pagpusil patay sa manager sa sagingan alas 6:45 sa buntag, Sabado, Oktubre 5, 2024, sa Alabel, Sarangani Province.
Giila ang bikitma nga si Julius Tibay, 45-anyos, minyo ug molupyo sa Purok 8, Barangay Poblacion, Alabel.
Gibutyag ni Alabel Chief of Police, Lieutenant Colonel Rey Delantein, nga sakay sa iyang motorsiklo ang biktima paingon na unta nga motrabaho sa usa ka banana plantation sa Barangay Domolok sa maong lungsod gikan sa iyang gipuy-an.
Apan pag-abot ni Tibay sa Purok 1, Barangay Tokawal sa mao gihapong lungsod, kalit lang mibutho ang duha ka wala mailhing tawo ug gipusil kini sa makadaghang higayon gamit ang kalibre .45 nga pistola.
Abtik sab nga miikyas ang mga suspek sakay sa laing motor paingon sa hilit nga dapit sa Alabel.
Patay gilayon ang biktima nga nakaangkon og upat ka samad pinusilan sa nagkadaiyang parte sa lawas.
Nagtuo ang pamilya ni Tibay nga posibleng dunay kalabutan sa iyang trabaho isip manager sa sagingan ang hinungdan sa pagpatay sa biktima.
Hinuon, duna nay person of interest nga giimbestigahan ang Alabel Municipal Police Station sa maong krimen. (Edgar E. Fuerzas)
