Ben Madilynn
Nagpaalim sa ilang mga samad tinigbasan ang inahan ug anak nga taga Purok 4, Barangay Pili, Danao City human gisulong sa ilang silingan ug nanigbas kay nagduda nga maoy responsable sa pagkawala sa iyang binuhi nga baka.
Apan ang anak nga 29 anyos ang nakabawos sab og tigbas ngadto sa suspek human iyang nailog ang sundang.
Ang maong insidente nahitabo kadlawon sa Huwebes, Agusto 29, 2024 sa naasoy nga dapit.
Ang mga biktima nga gitago sa pangalan nga Gelo, 29 ug ang 64 anyos niini nga inahan nga si Lita ang gidala Cebu Provincial Hospital – Danao City. Samtang ang suspek alyas Ed, 40, minyo, silingan ra sab sa mga biktima.
Base sa imbestigasyon sa Danao City police nga sa wa pa ang hitabo, misulong si Ed ngadto sa balay sa mga biktima bitbit ang sundang ug laing hait nga hinagiban nga nangita sa iyang baka.
Nagduda ang suspek nga may kalambigitan ang mga biktima sa pagkawala sa iyang hayop.
Mitumaw ang panaglalis tali ni Gelo ug Ed nga misangpot sa pagpanigbas samtang si Lita nga miuwang sa away ang lakip nga natigbasan atol sa komosyon.
Bisan nga samaran na si Gelo nakahimo pa kini sa pag-ilog sa sundang ug mibawos sab sa pagpanigbas ngadto sa suspek.
Atol niining pagsulat, ang suspek pabilin pa nga way panimuot. / DVG
