Magtiayon gidumbolan sa laing motor, nangaangol

Nakaangkon og pangos ug paso ang drayber sa motorsiklo ug ang angkas niini human sila gidumbolan sa laing motorsiklo nga nagsunod kanila alas 8 pasado sa Biyernes, Mayo 30, 2025, sa may Banawa, Barangay Guadalupe, Dakbayan sa Sugbo.

Ang mga naangol giila nga si alyas Roel, 46 ug ang iyang asawa nga si alyas Marisa, nga iya untang ihatud sa trabahuan.

Si Marisa nagkanayon nga gikan sila sa Banawa ug ihatud unta siya sa iyang bana apan pag-abot sa maong dapit, kalit lang sila’ng gidumbol sa usa ka motorsiklo nga giingong kusog ang dagan hinungdan nga natumba og nadat-ugan ang ilang mga tiil.

Samtang sa habig ni alyas Nestor, ang drayber sa motor nga mibangga, kini niingon nga hinay ra iyang dagan apan wala kaayo mokupot ang brake sa motor.

Sa dihang gipangayuan sa imbestigador gikan sa Traffic Enforcement Unit sa Cebu City Police Office sa iyang driver’s license si Nestor, wala kini nakapakita kay matod niya nahibilin ug niangkon nga gihuwaman ra niya ang motor.

Matod sa magtiagyon nga magpabayad sila sa na-damage sa ilang motor ingon man sa pagpapatambal sa ilang mga tiil. / JDG