Ben Madilynn
Mga duwa karon;
5:00 pm- Rain or Shine batok NLEX
7:30 pm- TNT batok Magnolia
Pahugtan og suway sa TNT Tropang Giga ang ilang paggunit sa liderato sa Group A sa ilang pagpakigsangka sa Magnolia Chicken Timplados Hotshots sa main game karong Martes sa gabii, Septiyembre 17, 2024, sa Philippine Basketball Association (PBA) Season 49 Governors’ Cup sa Ninoy Aquino Stadium.
Ang Tropang Giga kasamtangang nag-inusara sa ibabaw nga bahin sa ilang grupo dala ang 6-1 nga rekord samtang naa sa ikatulo ang Hotshots nga adunay 4-3 nga rekord.
Nakaseguro na man tuod og puwesto sa best-of-five crossover quarter-finals ang Tropang Giga apan wala pa sila’y rason nga magmaya tungod kay nagkinahanglan pa sila nga makadugang og kadaugan aron magpabilin sa ilang mga kamot ang No. 1 nga puwesto sa ilang grupo.
Mahinungdanon nga makuha ang No. 1 nga luna human sa group elimination tungod kay ikasangka niini ang No. 4 squad sa laing grupo sa quarter-finals.
Ning puntoha, ang Tropang Giga nagkinahanglan na lang og duha ka mga daog aron maseguro ang No. 1 nga puwesto sa Group A.
Sa ilang bahin, ang Hotshots naa pa sa delikadong sitwasyon hilabi na kon mapilde sila ning sangkaa.
Tungod niini, seguradong ihabwa sa Hotshots ang tanan nilang makaya ning kombatiha.
Sa premirong duwa, magsangka ang Rain or Shine Elasto Painters ug NLEX Road Warriors.
Ang Elasto Painters, nga adunay 5-2 nga rekord, kasamtangang nakigbahin sa magsuong teams San Miguel Beermen ug Brgy. Ginebra Gin Kings sa liderato sa Group B samtang nagsunod ang Road Warriors nga adunay 3-4 nga rekord./ ESL
