LTFRB:Pagpangayo og dobleng pletehan gidili

Gipahimangnoan sa Land Transportation Franchising and Regulatory Board (LTFRB) ang mga drayber ug operator sa mga Public Utility Vehicles (PUV) nga ilegal ang pagpangayo og doble nga pletehan ngadto sa pasahero nga gihulagway nga tambok.

Base sa giluwatanga ni LTFRB Chairperson Atty. Teofilo Guadiz III nipasidaan human makadawat og mga reklamo nga kadtong mga dagko og lawas o tambok nga pasahero ang pangayoan og doble nga pletehan nga wa na mosubay sa gipatuman nga taripa.

Gisaway ni Guadiz ang maong binuhatan nga usa ka matang sa discrimination ug nagsupak sa balaod.

“Regardless of a passenger’s size, the fare covers one person. This practice of overcharging is not only unlawful — it is discriminatory and fundamentally unjust,” matod pa ni Guadiz.

“Any form of fare manipulation based on personal characteristics, including body size, is a clear violation of LTFRB regulations and human rights principles,” dugang pa niya.

Gipahinumdoman sa LTFRB chief nga ang pampublikong transportasyon gikinahanglan nga accessible ug adunay pagtahod sa tanan, ug walay lugar ang diskriminasyon sa sistema sa transportasyon sa nasud.

Matod ni Guadiz, nga kadtong mohimo sa maong kalapasan ang mag-atubang silot sama sa multa, suspensyon sa operasyon, o pagwagtang sa ilang prangkisa base sa guidelines nga gipatuman sa LTFRB.

Iyang giawhan ang mga pasahero nga makasinati o makasaksi nga mokolekta og doble nga pletehan ipadangat ang reklamo pinaagi sa LTFRB hotline 1342, o ngadto sa opisyal nga social media pages, o pinaagi sa email sa complaints@ltfrb.gov.ph. / TPM / SunStar Philippines