LMPC nagmadaugon sa nasudnong kompetisyon

LAMAC, PINAMUNGAJAN, CEBU — Usa ka dakong kadaugan ang gisaulog sa Lamac Multi-Purpose Cooperative (LMPC) human nakuha ni Juniel ug Salome Lucero ang Top 1 spot sa iSTAR HERStories: Celebrating the Transformation of Juana Entrepreneurs, usa ka national nga kompetisyon nga nagpasidungog sa kababayen-an nga negosyante.

Nakakuha sila og 88.3 puntos nga maoy labing taas nga score sa tanang partisipante gikan sa nagkalainlaing bahin sa nasod. Ang ilang estorya sa kadasig, inobasyon, ug panaghiusa pinaagi sa kooperatiba usa ka hulmahan sa kalampusan alang sa kababayen-ang negosyante sa komunidad.

Lakip sab sa Top 10 si Shirly Canizares, usa ka miyembro sa LMPC, nga nakakuha sa 10th place pinaagi sa 74.4 ka puntos — usa ka pruweba nga ang Lamac nagapadayon nga motubo isip giya sa pagpalambo sa mga lokal nga negosyo nga pinangulohan sa kababayen-an.

Ang iSTAR HERStories usa ka programa nga gisuportahan sa Coca-Cola Philippines nga gitumong sa paghatag og dungog ug inspirasyon sa mga “Juana” nga nakigbisog taliwala sa kalisdahan sa kinabuhi aron nga makab-ot ang kalampusan. Ang duha ka kadaugan sa LMPC sa maong kompetisyon nagpakita sa katakos sa kooperatiba sa pag-amuma ug pagdasig sa mga kababayen-an nga mamumuo.

“Dili lang ni kadaugan para sa Lamac, apan para kini sa tanang kababayen-an nga mituo, milihok, ug mipatigbabaw,” matod sa representante sa LMPC.

Kini nga milestone nagpamatuod nga ang LMPC usa ka tinubdan sa inspirasyon, panaghiusa, ug kalampusan sa kalibutan sa kooperatiba ug kababayen-ang negosyo.