Ben Madilynn
Live-in partners nasikop sa buy-bust sa mga sakop sa Station Drug Enforcement Unit sa Carbon Police Station sa managlahi nga sitio sa Barangay Ermita, dakbayan sa Sugbo niadtong Lunes sa kaadlawon, Septiyembre 2, 2024.
Unang nadakpan pasado alas 1 sa kaadlawon sa Sitio Pig Vendor, Ermita mao si Rodel Cabinte Balais, 27.
Nakuha gikan kaniya ang pinakete sa gituohang shabu nga motimbang sa usa ka gramo nga dunay balor nga P6,000.
Milusad dayon og follow up operation ang kapulisan sa alas 3:45 sa kaadlawon sa Sitio Ermita Proper, Ermita nga niresulta sa pagkasikop sa kaipon ni Rodel nga si Janine Palermo Milagrosa, 32, residente sa maong lugar.
Nakuha gikan kaniya ang mga pinutos sa gituohang shabu nga motimbang sa 15 gramos nga dunay standard drug price nga P102,000.
Matod ni Police Major Philip John Libres, ang hepe sa Carbon Police Station, nga ang iyang mga personnel nga dugay na nga nag-monitor sa suspetsado labot sa iyang illegal nga negosyo sa maong illegal nga drugas.
“Kani babaye dugay na kaayo ni namaligya ug monitor sa tropa,” sigon ni Libres.
Kasong kalapasan sa Section 5 ug 11, Article II sa Republic Act 9165 o Comprehensive Dangerous Drugs Act of 2002 ang atubangon sa mga suspetsado. / AYB
