Ben Madilynn
Subay sa hugot nga seguridad nga ipatuman sa kapulisan sa Dakbayan sa Sugbo atol sa Regionalized Bar Examination sa Dominggo, Septiyembre 8, 2024, hugtanong ipatuman ang liquor ban sa mga lugar nga nasulod sa 100 meter radius sa University of San Jose Recoletos (USJR) Basak Campus.
Kini ubos sa Executive Order No. 17, s.2024 nga giluwatan ni Cebu City Acting Mayor Raymond Alvin Garcia.
Magsugod ang liquor ban alas 12 sa tungang gabii sa Sabado, Septiyembre 7 ug matapos sa alas 11:59 sa gabii Domingo, Septembre 8, 2023.
Susama sab ang ipatuman sa ikaduhang adlaw sa Bar Exam sa Miyerkules, Septiyembre 11 ug sa katapusang adlaw sa sunod Domingo, Septiyembre 15, 2024.
Gawas sa liquor ban nga giluwatan sa buhatan sa acting mayor ila usab ipatuman ang Anti-Noise Ordinance.
Gipahibawo sa Cebu City Police Office nga gidili ang pagpatukar og mga kanta, videoke ug kusog nga bosina sa mga sakyanan duol sa maong venue nga makatugaw sa bar examinees.
Giawhag sa kapulisan ang mga panimalay ug mga tindahan sa palibot sa USJR Basak campus nga tumanon lang ang maong kamandoan sanglit dili man usab kini kanunay. / AYB
