LGU Vintar, mangilatang ti pundo para iti anti-rabies vaccine

LAOAG CITY – Inpakaammo ni Mayor Richard Degala iti ili ti Vintar a mangilatangda ti pundo para iti pannakaigatang ti anti-rabies vaccine.

Segun kenkuana, babaen iti daytoy ket adda ti mausar para kadagiti maseknan nga umili a makagat ti ayup kas ti aso ken pusa.

Inbatadna a seryoso ti lokal a gobierno maipapan iti daytoy a banag isu nga adda pay ti naisayangkat a Public Hearing dagiti amin a kapitan tapno mapagsasaritaan daytoy a naimbag.

Kunana a kalikagumna a maipababa ti kaso dagiti mairekrekord a makagkagat ti ayup iti ilida.

Gapu iti daytoy, naminsan manen nga inpalagip ni Mayor Degala ti responsibilidad dagiti addaan ti taraken ti aso nga ibaud dagitoy tapno saanda a makadesgrasia.

Kabayatanna, kuna ti Mayor a manarimaan ti panagadalda iti panangputar ti maysa nga ordinansa maipanggep iti daytoy a banag.