Ben Madilynn
Nalandig sa tambalanan ang usa ka 21 anyos nga ulitawo sa dihang nakabaton og samad tinigbasan sa iyang tiil sa dihang gitigbas, alas 11:30 sa gabii, Dominggo, Septiyember 22, 2024, sa Purok B4, Brgy. Balirong, Siyudad sa Naga.
Ang biktima mao si Rey David Puebla’s Aldava, 21, samtang ang suspek mao ang iyang silingan nga si Danilo Caballero Bascon, 62, ug minyo.
Sa pakisusi sa Superbalita Cebu nasayran pinaagi sa imbestigasyon sa kapulisan ubos sa kamanduan sa ilang hepe nga si P/Lt. Col William Homoc nga ang biktima nakig-inom sa balay sa iyang silingan nga amigo ug matod pa nga ang suspek kalit nga niabot nga nanghagit og sumbagay nga nagdala og sundang. Ang biktima ug ang barkada niini buot unta nga moimbargo sa sundang sa suspek apan atol sa inilugay naigo ang biktima sa tuong tiilan.
Ang suspek nadakpan sa mga barangay tanod nga niresponde sa maong panigbas ug naimbargo ang sundang ug gi-turnover ang suspek ug ang sundang ngadto sa mga niresponding polis samtang ang biktima gi dala sa tambalanan./DVG
