Lalaki gipatay sa Sawang Calero

Atol niining pagsuwat nagpadayon ang imbestigasyon sa kapulisan sa posible’ng motibo sa pagpusil patay sa usa ka 34 anyos nga lalaki niadtong alas 11:00 pasado sa gabii, Sabado, Mayo 24, 2025 sa Sityo Buwaran, Barangay Sawang Calero, Dakbayan sa Sugbo.

Ang biktima nailhan nga si Janrey Quirante, way trabaho, taga General Genes, Barangay Suba, Cebu City ang napalgan sa naasoy’ng dapit nga nagkadugo na nga nahay-ad.

Ang buhatan sa Police Station 6 (Pasil Police Station), ang gipahibawo sa nahitabong pagpamusil sa Sityo Buwaran ug pag-abot sa lugar nahay-ad nga lalaki nga wa nay kinabuhi mao nalay naabtan sa responding team.

Si Quirante gihulagway nga dead on the spot gumikan sa samad pinusilan sa iyang ulo.

Gisubay sa kapulisan ang mamumuno nga responsable sa maong krimen nga giingong nakasibat human sa pagpamusil. Gisusi sab sa kapulisan ang mga CCTV camera sa area aron nga masubay ang suspek ingon man ang pag-ila niini. / JDG