Ben Madilynn
PADAYONG gitambalan sulod sa balay tambalanan ang laborer human pusila sa usa ka sekyu sa Purok 4, Barangay Katipunan, Kapalong, Davao del Norte alas 10:50 sa gabii, Martes, Agosto 29, 2024.
Ang biktima giila nga si William Villarmino Romero, 40-anyos, minyo, samtang ang suspek nailhan sa pangalang Roland Semblante Cagay alyas Dodong Balut, 47-anyos, minyo, ug parehong molupyo sa nahisgutang dapit.
Base sa inisyal nga imbestigasyon, nasayran nga ang biktima sakay sa gimanehong motorsiklo niini, uban sa iyang anak nga angkas niadtong higayona.
Apan giingong pag-abot sa biktima sa nahisgutang dapit sa wa masayring rason, gipusil siya sa suspek gamit ang mubo nga klase sa armas ug maayong pagkaigo sa tuong bahin sa paa.
Human sa gihimong pagpamusil, ang suspek nagdaling mikagiw paingon sa wala masayring direksiyon samtang ang biktima gidali pagdala ngadto sa Kapalong District Hospital sakay sa ambulansiya aron matambalan.
Narekober sa mga tinugyanan sa balaod gikan sa crime scene ang usa ka basiyo sa bala.
Hugtanong aksiyon ang gilusad sa kapulisan sa Kapalong Municipal Police Station sa tinguha nga madakpan ang suspek ug mapasakaan og kaso sa korte. (DTV)
