Kontraktor, inkarida a saan nga agbayag iti maysa a tawen ti Kontruksyon ti kalsada idiay Km. 3 agingga Km 5. La Trinidad, Benguet nupay daytoy ti naituding a deadline

Impanamnama dagiti kontraktor a saan nga agbayag iti maysa a tawen ti manarimaan a konstruksyon ti kalsada idiay Km. 3 agingga Km.5, La Trinidad, Benguet.

Iti interview ti Bombo Radyo, kinuna ni La Trinidad Mayor Romeo Salda, nairugi ti kontruksyon idi napan a bulan ken naituding a malpas inton Hunyo 2025 ngem nakisaritada kadagiti kontraktor tapno mapapartak daytoy.

Inrekomendar ti lokal a gobyerno ti La Trinidad ti baente kwatro oras a panagtrabaho dagiti kontraktor tapno saan a dumanon iti maysa a tawen ti kontruksyon ti kalsada.

Impetteng ni Mayor Salda a nasken nga adda ti 90 meters a maipalpas tunggal aldaw gapu ta dumanon iti maysa ken kagudwa a kilometro ti nasken a maisimpa a kalsada.

Gapu iti daytoy, kidkiddawen ti Mayor kadagiti pribado a lugan a mapan iti siyudad ti Baguio ken idiay La Trinidad a magnada kadagiti alternatibo a ruta kas iti Longlong-Tam-awan Road, Tawang-Ambiong Road ken Shilan-Lamut Road tapno saan unay a mapasaran ti nailet a gunay ti trapiko iti sentro ti munisipyo.

Maipalagip a napasaran idi kalman ti attidog unay a pila kadagiti paradaan ti jeep a paturong idiay La Trinidad partikular idiay Rizal Park ken Magsaysay gapu iti napigsa a panagbayakabak ti tudo ken ti manarimaan a konstruksyon ti kalsada.